نداء من حسن خليل: "وين صار التدقيق الجنائي"؟

كتب الخبير الإقتصادي حسن خليل: بعرف ما حدا بدو يسمع.. هناك عمل جدي لتقسيم لبنان جزيئات وفوضى حتى زواله..

واضاف خليل: يا رئيس الجمهورية..
يا رئيس حكومة ووزراء..
يا رئيس مجلس ونواب..
يا شعب..
اسمعوا..
بنعرف في قصف وقتل..
لكن..
خلصت نشوة انتخابات الرئاسة وتاليف حكومة.. ونواب.. وبعدين؟
خلصت الحفلات والمهرجانات الموسيقية واستقبالات البروتوكول للفاسدين.. وبعدين؟
ما عندكم ولا جهد بالملفات الداخلية؟ بس ولو ٢٥٪ من جهدكم "للسيادة"..
خلصت التعيينات والتوزيعات.. وبعدين؟
وين صار مشروع قانون الفجوة؟
وين صار إعادة هيكلة المصارف؟
وين صار الكابيتال كونترول؟
وين صارت المفاوضات الحجرية مع صندوق النقد؟ وين اللجنة الوزارية مال واقتصاد وخبراء؟
وين صار التدقيق الجنائي؟
وين صار القضاء.. واصلاح القضاء ومحاسبة القضاة الحزبيين والفاسدين؟ بس تعيين مدعي عام بعد تقاعد الاخير؟ وبس تبرئة قتلة الجيش وسارقين المال العام.. يحيا العدل..
وين صار سلامة وكل فريقه ومافيات المصارف شركاءه؟
وين صارت التحقيقات النيابية بالكهرباء المولدات ووزراء الاتصالات؟ ووزير الصناعة ووزير الاقتصاد المفتوح تحقيق فيهم؟ ووزراء المالية؟
وين صارت الودائع والتعاميم الغير قانونية؟
يا عمي.. وين البنك المركزي ومغارة علي بابا والاربع مليون حرامي..؟
ومليون سؤال غيرهم..
بس المهم التلفزيونات عم تعمل ندوات حول الفيدرالية والتقسيم.. وموارنة(عفوا مسيحيي) وسنة وشيعة ودروز.. ومجبور كل مواطن يكون على مذهب..
كل الطوائف.. كلها مجرمة بحق لبنان..
عصابات محترفة.. وشعب متأقلم.. مغلوب على امره؟ صحيح.. لكنه ايضا مجرم مرتكب لانه عنصري..
وبيسالنا البعض ما نروج تشاؤم.. واعطاء الحل..
اسالوه.. وخليه يسأل حاله اولا: هو شو؟ من اي مذهب..
اذا جاوب اي جواب، يعني ما في حل مع الغرائز والغباء..
بعرف ما حدا بدو يسمع.. هناك عمل جدي لتقسيم لبنان جزيئات وفوضى حتى زواله..
يا رب اكون غلطان.. وما يكون حدسي صحيح متل وقت اخبرتكم عن الودائع من ٢٨ سنة..
يا رب كون غلطان..