نجم كتيلي: أيمتى بدكن تحاسبوا وأيمتى بدكن تشتغلوا؟

كتبت نائبة رئيس التيار الوطني الحر للشؤون السياسية مارتين نجم كتيلي:
دولة الرئيس نواف سلام، يللي منقدره ومنحترمه، السدود مش مصروف زائد لتقول "ما رح ندفع عليها". السدود مَيّ لبنان وثروته وأمنه المائي. وإذا كل ما وصلتوا لملف فيه إنفاق قلتوا "بدنا نحاسب"، فالسؤال: أيمتى بدكن تحاسبوا وأيمتى بدكن تشتغلوا؟
وبالكهربا، القصة أوضح. اللبناني ما بدو شعارات وهروب للأمام. بدو كهربا الدولة. بدو معامل تشتغل، وقطاع يتصلّح. أما إبقاء الناس أسرى المولدات، وبعدها التذرّع بالإصلاح والمحاسبة، فهيدا مش إدارة دولة.
المحاسبة ما بتعني شلّ الدولة وتحميل اللبنانيين نتائج العجز. طيب حاسبوا على الأخطاء، بس فرجونا شو عملتوا غير توقيف المشاريع، وفضايح الفيول ونار البنزين والمازوت والنازحين والتحاصص والتمذهب بقلب المذهبية…!
جلجلة لبنان إنو عنده حكومة عم تقول للناس صراحة بدنا نجوعكن ونعطشكن، ما رح ندفع على المَي والكهربا، روحوا انتحروا على أبواب اصحاب الموتورات والسيترنات!
اذا مش هيدا اعدام لدولة الرعاية، شو هو؟!