عودة بالذاكرة-بعد 10 سنوات… لماذا رفض ميرجان بو شعيا جائزة «الموركس دور»؟

سابقة غير معتادة في «الموركس دور» تعود إلى الواجهة بعد عقد من الزمن، بعدما اختار المخرج ميرجان بو شعيا رفض جائزة أفضل فيلم عام 2016، في موقف حمل رسالة واضحة أراد من خلالها الدعوة إلى التغيير والتصويب على ما اعتبره «الصح».

اليوم، وبعد مرور عشر سنوات على تلك الواقعة، أعاد بو شعيا نشر مقطع من الفيديو الذي تلاه آنذاك الممثل إلس سعادة، وأُعلن من خلاله رفض الجائزة.

وأرفق المخرج الفيديو ببيان توضيحي يشرح فيه خلفيات قراره وأسباب رفضه للجائزة، ليعيد بذلك فتح النقاش حول موقف لافت شكّل يومها سابقة غير مألوفة في حفلات توزيع الجوائز.

واقعة تعود إلى عام 2016، لكن إعادة نشرها اليوم تطرح مجدداً السؤال: هل يمكن لرفض جائزة أن يكون وسيلة للتغيير والتصويب على ما هو «صح»؟

من عشر سنين، الموقف فَرَض حالُه علينا. لا طلبنا نشارك ولا اتقدّمنا على المسابقة. انعرضت عليي الجائزة واعتذرت فوراً. عرفت من بعدها انه في مرحلة اسمها "تصويت الجمهور" ماشية وفيلمنا مطروح ضمن المسابقة من دون موافقتنا أو حتّى علمنا بالموضوع.

طيّب ليش الناس عم تصوّت إذا مقرّرين مسبقاً لمين بدّها تنعطى الجائزة؟

طلبت سحب 'فيلم كتير كبير' من هيك آليّة مش واضحة فيها المعايير. الرّد كان إنّه الجماعة حابّين يعطوك الجائزة. أنت شو خسران؟

- على راسي، شكراً، بس أنا ما بدّي ياها. في مجال تعيفونا من المشاركة؟ ويعطيكن ألف عافية.

- إنت ليش عم تصعّبها؟ اعتبرها تكريم للفيلم و"إكسپوجر" لإلك.

"اكسبوجر”… العملة الصعبة لي بتحدد سعر الصرف والتداول بهيدا المجال.

بحكم إني كنت مسافر ليلة توزيع الجوائز، بيِطرحوا عليي أنه حدا غيري يستلم الجائزة عنّي، وإلّا، وبكل بساطة، بيَعطو الجائزة لفيلم تاني، من اختيارهم أكيد، وبضَلّ 'فيلم كتير كبير' مطروح ضمن "المسابقة".

يعني صرنا رح نطلع "خسرانين" لأن ما قبلنا نستلم جائزة بمسابقة ما طلبنا نشارك فيها بالأساس.

هون قرّرت مع أسرة الفيلم تكريس الوقت المخصّص لجائزة أفضل فيلم للتعبير عن موقفنا تجاه الغلط لي عم بيصير، ويلّي، مع الأسف، بيشبه كتير من الممارسات بهيدا البلد، لعلّه "الاكسبوجر" بتنصرف بالمحل الصح.

كتبت النّص، وقِبل بطل الفيلم، ولي شارك بالكتابة، ألان سعادة، الجليل الذكر، يطلع ويقوم بالواجب.

وبعد،

- إنت ليش عامل فيها يابا مواقف وبلبلة؟ قبلك كتار و"كبار" أخدوها.

هو هون لبّ الموضوع: شيلوني أنا من المعادلة… لمّا حدا من هالكبار لي عندن قيمة فنيّة/إعلامية/ثقافية يِقبَل ياخد أي جائزة، ونرجع نشوف الجائزة نفسها عم تروح لحدا ما عنده أي قيمة فنيّة/إعلاميّة/ثقافيّة تُذكر بس مصادف إنّه صديق أو داعم أو صديق لحدا داعم الجائزة، وأكيد مع عدم وضوح معايير الاختيار…
شو منكون عملنا؟ شو منكون عم نقول للناس لي مفكرا حالها عم تصوّت وتشارك بالنتيجة؟ "الجمهور عايز كدا"؟

بشو عم تطلبو منّا نشارك يا جماعة؟

بعد عشر سنين، ولو بعد عشرة آلاف سنة "الغلط بيبقى غلط ولو مين ما كان مستفيد منّه. متل ما الصح بيبقى صح ولو مين ما كان ضدّه.

لمشاهدة الفيديو على الرابط التالي: https://www.instagram.com/reel/Dc6cDkER0ff/?igsi=ZWtidWNlcDRzempi