<
31 August 2015
انتبهو يا اخوتنا المتظاهرين...

سمير مسره -

مش من قيمتكن يا اخوتنا المتظاهرين يللي نزلتو السبت الماضي عالساحات وبلشتو بعد طول انتظار تناضلو انتو كمان ضد الفساد متل ما نحنا عملنا من زمان ولا نزال، إنّو تمشو بعفوية تحت عباءة البعض من منظمي التحرك يللي اثبتو بلسانن السيء وتصرفاتن المهينة للآخرين إنّو عندن ابشع انواع الفساد وهو فساد الأخلاق.

ما لازم تخلوهم يجروكم الى الشتائم والى مفردات بتمس الكرامات والى تصرفات بعيدة عن الآداب متل ما عمل البعض من الحاقدين والمأجورين. هيدا شي معيب تجاه حرية التعبير اولاً وتجاهكم انتو شخصياً. بس بتعرفو، مش الحق علين هني بس، الحق كمان على البعض من قادة الرأي يللي عّم بيغطي عن قصد او غير قصد هل الكلام الفتنوي من وراء الكواليس وبيتدعو العفة والشرف وهني اكيد بيعرفو حالن. ولو، ما سمعنا ولا واحد منن بالاعلام استنكر هيك نوع من الشعارات واليافطات.

صدقوني، فساد الأخلاق اخطر بكتير من فساد الأفعال. أكيد فيك تشفى من التاني بس ما فيك بولا ظرف من الظروف إنّو تتخلص من الاول.

انتبهوا يا اخوتنا المتظاهرين. ضلكن عم تضغطو لتحقيق مطالبكم ومطالبنا بس كونو ارقى منن. ما تخلوهم يستغلوكم بلعبة البروباغندا الهدامة يللي بالنهاية فيا تودينا الى فوضى مفتوحة معروف كيف بتبلش ومش معروف كيف بتنتهي. ما تنسوا شو صار وعم بيصير حولنا من خراب.